Bushenyi baremirwe miriyooni 2 kwohereza ab'ebikonde omuri Misri

 

Abateezi b’ekikonde aba Uganda nibagumizamu n’okubonabona ahabw’emihondano eri omukibiina ekirikujunaanizibwa emizaano y’ebikonde bwanyima y’okugyemeserezibwa kweshashura kutunga ebihandiiko ebirikubaikiriza kutambura kuruga omu ihanga kuza omumpaka w’ensi yoona z’okuteera ekikonde omururembo Cairo omuri Misri.

Eki nikiijaho bwanyima y’akakiiko akarikukurira emizaano omu ihanga kushazamu obuhwezi bwona oburikuza omukibiina ekirikukurira omuzaano gw’ebikonde bwanyima y’emihondano etwaire eri omunda y’ekibiina eki.

Omukukora ekyo, ekibiina eki ekirikwebemberwa Patrick Luyooza bagumeizemu n’okutebeekanisa okutoorana abazaani abarungi kuza omumpaka. Omukutoorana oku, abazaani 17 nibo baatoorainwe obwo harimu n’akazi 4 kandi aba barugire ahakishaayi Entebbe barikugyendera omunyonyi eza kampuni ya Ethiopia Airlines

Beitu hoona, abazaani bashabirwe kweshashurira byona ebikwatsire aharugyendo rwabo kandi ngu ekibiina nikiija kushashurira oburaaro ku baraabe bari omuri Misri.

Omubazaani 17, babiri, VBriar Ndyamuhaki na Noah Mugisha nibaruga omu kiraabu ya Power Rangers KBC eya Ishaka Bushenyikandi aba n’omurundi gwabo gw’okubanza kuza omumpaka z’orurego rw’ensi yoona.

Beitu aba bombi nibagira ngu kikabagumira munonga kutunga shiringi 2.24 z’okwereeberera ahabw’ebihandiiko byabo by’okutambura

“Twefeireho ahabw’okuba titubaasize kutunga obuhwezi kuruga omu disiturikiti yaitu, ekibiina ekirikukurira omuzaano gw’ebikonde nangwa n’akakiiko akarikukurira eby’emizaano,” Noah Mugisha nikwo agizire.

Hoona n’omutsigazi muto, Brair Ndyamuhaki nawe nikwo agumeirwe munonga atyo reeru akatandika kutwisa ab’omuka ye omuri Bushenyi kurundaana kureebeka ngu yaahisya sente.

“Mbaire ntarikubaasa kurundaana nkahisya sente ezi nyenka kandi mabire natrikwenda kufeerwa omugisha ogu. N’ahabw’ekyo naacwamu kwirukangira omuka kusherura obuhwezi kandi nabo nikwo kuntwera,” Ndyamuhaki nikwo agizire obwo batakasimbwire aha Sande.

Nibagira ngu akatabo k’okutamburiraho niketaaga shiringi 300,000, ekipapura ekirikukwikiriza kuza omu eihanga erindi n’ekya shiringi 240,000 kandi akakongi k’okutemba enyonyi nikagura shiringi 1,500,000 hamwe n’ebirikugyenderaho ekirikureetera byona byakwata omuri shiringi 2,240,000

Mugisha kandi hoona ori omuzaani w’omururengo rwa”Lightweight” naija kuhayana omumpaka z’emiringo eya Muaythai na K1, nikyo kimwe na Ndyamuhaki kandi hoona orikuza kuhayana omururengo orwa Welterweight.

Aba boorekire omutindo murungi kukira abazaani abaingi omumpaka z’okutooraamu omuri Kampala nikwo kutunga emyanya y’okuza aha tiimu obwo barikwegaita ahabandi 15 kuza omumpaka ezirikuza kuhinda kuhisya ebiro 24 okwezi oku.

Abazaani b’ekikonde aba Uganda barimu Juma Jantuyo, Gerald Mbuga, Noah Mugisha, Sanannah Rian, Rebecca Israel Among, Award Kazimba, Paul Angalla, Ronald Odoch, James Owara, Josephine Twani, Edith Pedun, Joseph Onyait, Patricia Apolot, Blair Ndyamuhaki, Eria Mukama, Musa Musobya, Derick Mwirugazu na Micheal Ngabo.

N’ebya Aloysius Byamukama
#WestSports