Ekishaayi kya Bushenyi bakizitiriire ahabw’enkoresa mbi

Bingi omubishaayi by’emipiira omu ihanga bitaahiriiirwe ebimwe byatwarwa abarikukora eby’obushuubuzi kadi ebimwe binagirweho kandi byasiisikara obwo barikuriisizamu hamwe n’okukoreramu endiijo mirimo etakwatiraine n’omuzaano gw’omupiira.

Eki nikyo kihikire ahakishaayi kya Bushenyi ekihango omu tauni ya Bushenyi ekiherize obwire buraingwa riri eiriisizo ry’abariisa abakihereire hamwe n’amashomero g’omutauni egyo agarikutendekyeramu okuvuga motoka  

Hoona ekizibu eki kihweire bwanyima y’orubaju rw’eby’emizaano ahabwa disiturikiti ya Bushenyi kwija bakakizitiirira kwemereza enkoresa mbi egi.

“Tumanyire ngu enkoresa mbi hamwe n’okushiisha ekishaayi oku kuhikire ahamuringo mubi munonga, n’ahabw’ekyo twizire kujuna ekishaayi eki turikukizitiirira kwemereza okusiisikara oku,” Abel Kamugisha, orikwebembera eby’emizaano ahadisiturikiti ya Bushenyi nikwo arikugira.

Kamugisha naagira ngu abantu abatwire nibashiisha ekishaayi eki barabwirwe kandi na poorisi emanyisiibwe kukwata abo boona abarikuraba omukishaayi eki.

Omugwa 2004, omurimo gw’okuhunduuza ekishaayi eki ogwabeire nigubarirwa kumaraho sente zirikuhika shiringi miriyooni 964 tigurakozirwe nk’oku endagaano yaabeire negamba ekyareeteire abarikukunda omuzaano gw’omupiira omukyanga ekyo kutaho obwesharingo.

Hoona disiturikiti ekaija yaataho shiringi miriyooni 100 erikukoresa kampuni ya S.T Company Limited kandi hoona abaakozire omurimo ogwareeteire ekishaayi kyahika omumbeera y’okuzaanirwamu

Obwa hati ekishaayi nikizaanirwamu emizaano y’ekyanga ekya Burengyerwa-izooba kandi ba kirinju ba Bushenyi nibo barikukira kukoresa ekishaayi eki. Eki nabwo kikaba nikizaanirwamu emizaano y’amashomero hamwe na za kiraabu ezindi obu endwara ya COVID19 yabeire etakaizire.

Kamugisha naikiriza ngu disiturikiti neija kuta sente omumirimo y’okuhunduuza ekishaayi kandi bateho n’ahi abazaani barikushutama ahabw’okugira ngu eki nikyo kishaayi kikuru kya disiturikiti

N’ebya Aloysius Byamukama
#WestSports