Empaka z'epiki zigiiremu tiimu y'omwana n'omuzaire

Empaka z’epiki eza MAU-Challenge 4 ezirikuza kubaho aha Sande egi ahamwanya ogu barikuvugiramu empaka z’epiki ogwa Uganda Motorsport Arena omuri Busiika zibaasa kubonera munonga okutaana ahazindi beitu abahagizi tibarikwija kuzaasa kuzireeba ahabw’ebiragiro by’okukingira okujanjaara kw’endwara ya #COVID19 ebyateirweho ekitongore ky’eby’amagara.

Empaka nizibandiza encuro ya 4 ey’ekibiina ekirikukurira eby’emotoka z’empaka Motorcycling Association (MAU) ezirikuza kubaho 10.10.2021 ahi abazaire barikwija kuba nibegaita n’abaana baabo omukibina ekya 85cc kandi tiimu erasingye neija kusingura shiringi 500,000.

Okurugiirira ahabiragiro, omwana ku aratandikye omurundi gw’okubanza omuzaire naija kuvuga omurundi ogwa kabiri

“Eego. Ekiteekateeko eki tukitandikireho kuhiga abaana baitu kwejumbira omumuzaano ogu kandi twayetebeekaneise ahabw’emizaano,” Joseph Opio orikukurira emirimo y’empaka ezi nikwo arikugira.

“Nitwija kuba twine emirundi omururengo orwa 85cc kandi omwana ku arikutandika empaka ez’okubanza, omuzaire naija kuza omumpaka eza kabiri obwo barikuvuga epiki niy’emwe kandi abarasingure nibaija kwetungira ekiconco kirungi oteiremu na shiringi 500,000,” nikwo Opio ashoboroire.

Ali Omar naija kwegaita n’omutabani Waleed Omar beitu ashabire kukoresa empiki empango ninga kupangisa omumanyi oraamujwekyere.

Nyetebeekanisize empaka ezi kwonka ekizibu negaari eya 85cc. Nembeera nkye. Nimbaasa n’okugihenda,” Omar orikuremeera kiro 130 nikwo arikugira.

“Eki ndikumanya, Barak Orland na Ronald Ssebuguzi tibarikubaasa kuika ahagaari ezi eza 85cc. N’ahabw’ekyo ninshaba ngu batuhe haakiri eza 125 ninga batwikirize tupangise abandi bavugi,” Omar nikwo arikwongyeraho.

Barak ku bamubuurize, agizire ngu we yayetebeekaniise kandi arinzire eizooba ryonka.

Hariho okuhayana kw’amaani omu tiimu ezirimu Ssebuguzi n’omutabani Gift Ssebuguzi, Barak n’omutabani Alon Orland, Ashraf Mbabazi n’omutabani Ashi Mbabazi Junior, Tony Akaaki n’omutabani Milton Akaaki Lubega.

Abandi ni Julius Bukenya n’omutabani Marcus Bukenya, Peter Ndiwalana n’omutabani Kreidah Nsubuga hamwe Godfrey Lubega orikukira kumanywa nka Tall man n’omutabani Emmanuel Lubega hamwe na Robert Mawanda n’omutabani Jeremiah Mawanda.

Omwaka ogwahweire, ahakiro ky’abakazi orutaro rukaba ruri ahari ba nyina b’abaana obwo barikuvuga piki ez’enziga 4 barikushagikwa b’ishe b’abaana nari shi abakazi baabo.

Eky’omugisha mubi bwanyima y’orubazo rwa Purezidenti aharwakashatu, enteerane z’abantu aingi munonga tizikaikiriziibwe kandi n’amaramizo nigaikiriza abantu 200 bonka. Eki nikimanyisa ngu abahagizi b’omuzaano nibaija kugufeerwa ogaitsireho n’amashemererwa agu barikureeta omumuzaano ogu kuburaho

N'ebya Johnson Were

#WestSports