Eshato aha nyanja ya Bunyonyi

Lake Bunyonyi

N'ebya Namanya Job Apuuli.

 

 

Abataka b’omu disturikiti za Rubanda na Kabale abahereire enyanja ya Bunyonyi  emitima esiibire ebeehanikire bwanyima y’eshatokuteera enyanja egi eizooba rya nyomwebazyo (orwokubanza) omu ihangwe.


Okurugiirira ahabataka, batangaire  kureeba ekintu kitari kyabutosha kirikweshushaniriza ekicu kirikuruga ahaiguru kikagwa omu nyanja

Eki kibireho haihi na Natures Prime Island omugomborora ya  Bubaare omuri Rubanda.

Moses  Banyenzaki, oine eryato ahari Harutinda Landing site, nagira ngu eshato egi eteire omwanya ogu omubwire bwa shaaha ikumi z’eihangwe obu habaire nihagwa enjura y’amaani erimu emirabyo n’enkuba .

Banyenzaki agizire ngu bareebire ekicu kirikwera kirikushana nk’enjoka  kirikuruga ahiguru  kyateera omu nyanja.

Egi eshato egyemire obwato bwona obubaire  buri ahari Harutinda kwibira. Eky’omugisha omurungi tihabaireho ebintu byona ebisiisikaire ahabw’ekibaireho.

“Tugizire okwerarikirira  kw’amaani ahabw’okugira ngu ogu n’omurundi gwaitu gw’okubanza kugiraho empinduka nkengi omumbeera y’obwire,”  Banyenzaki nikwo arikugira.

Kurugiirira ahari Didas Kyarikora, omutaka wa Mugyera omugomborora ya Bufundi,  Rubanda disiturikiti  nagira ngu areebire ekicu kirikwera kiriweshushaniriza enjoka. Nagira ngu takimanyire kuhisya obu omuzeeyi obaire ari haihi atandikire kukishoboraho ngu n’eshato. Kyarikora ayongyeire yagira  ngu ku bamanyire ku eri eshato abantu batandikire kuteera enduuru n’okushaba ngu kikearekyera aho. Ayongyeire yagira ngu na hati abataka bitiinire.

Phillip Byarugaba omureebi ondiijo  omutaka wa Mugyera omugomborora ya Bufundi omuri Rubanda nagira ngu eshato egi ebaireho kumara edakiika 5 erikuteera omunyanja.

Byarugaba nagira ngu abataka abaingi bairukangire omunjura baaza omunshozi  kandi ab’amamotoka  na za piki bairukangiire omutawuni ya Kabale barikutiinirira amagara gaabo. Ayongyeire yagira ngu  babaire ab’omugisha murungi kugira ngu tihaine abafiire ningashi ebintu ebisiisikaire.

Eshato ni omwanya ogurikuba nigwetooroorera aha sipiidi yamaani omumwanya obwo gukwateine nitaka (ahansi) hamwe nekichu ekirikukira kwija n’eihunga