FUFA yatoorana Abdallah Mubiru nkomutendeki wa Cranes owahonaho

Abdallah Mubiru

Bwanyima yobaire ari omutendeki wa tiimu y'eihanga eya Uganda Cranes Sebastien Desabre kurekurira kwegaita ahari Pyramids eya Misiri, FUFA omu kasheeshe k'erizooba  yatoorana omutendeki Abdallah Mubiru owa Police nk'omutendeki wa tiimu egi owaho naho.

Mubiru now'okusikirwa Charles Livingstone Mbabazi. FUFA okurangirira Abdallah Mubiru na Charles Livingston Mbabazi kwakorerwa ahakitebe kikuru kya Fufa ahari Mengo kandi omukoro gwayebemberwa Puresidenti Moses Magogo.


Omu rukiiko oru Magogo yarangira ku Fufa yayemereza abatendeki boona obu Sebastien Desabre abaire nakora naabo otairemu n'abashaho hamwe n'abatendeki boona baza tiimu ento ey'emyaka 23,20 hamwe na 17.


Beitu ngwaba baine omugisha gw'okugaruka kushaba emirimo egi ahu abaraije kuhayana n'abandi endugamahanga.


Mubiru na Mbabazi abatoranwa nabokutendeka tiimu ya Cranes eratandikwe kweteekanisiza kampeyini y'empaka z'okutoranamu abarayetabe omu kikopo kya Chan ahu Uganda eratandike na Somali ahamuheru gw'okwezi oku.


Ababiri niibo babaire baine tiimu ya Cranes eyayetabire omu mpaka za COSAFA eziherize kuhwa omuri South Africa.


FUFA nabwe yatongoza kampeyini y'okureba ngu Uganda Cranes nabwe yatandika orugamba rw'okwetaba omu mpaka z'ekikopo kyensi yoona ezirabe omweihanga rya Amerika,Canada na Mexico 2026.