"Netball hati n'omurimo ogurikukora sente," Purezidenti Babirye

Purezidenti w’ekibiina ekirikwebembembera omuzaano gw’okubaka nari shi Netball omu ihanga Sarah Babirye ashabire boona abarikukunda omuzaano ogu omuri Burengyerwa-izooba bwa Uganda kutandika kuza omumuzaano ogu kwenda ngu ekyanga eki kiguganyirwemu kurungi omubiro by’omumaisho ebigutegyereize.

Babirye naagira ngu abantu b’omukyanga eki hamwe n’ebyanga ebindi, omuzaano ogu tibakagutangiriire kurungi ngu kandi nibeetaaga kwerekura bakatandikaho amashomero g’omuzaano ogu hamwe na za kiraabu ogaitsireho n’okushoma eby’okutendeka hamwe n’okushara empaka z’emuzaano kwenda ngu baganyirwe omumigisha eriyo neija omumuzaano ogu.

Eki babirye akigambire obu abeire nahendera omushomo gw’okutendeka abarikushara empaka z’omumpiira ogu ahabw’ekyanga ekya Burengyerwa-izooba ah’ishomero rya Bushenyi Town School omumunisiparite ya Bushenyi aharwakataano oruhwaire.

“Emwe ahanyomyo 12 z’omurimo gwaitu n’okukuguka omumuzaano kandi eki nikyo turikuba nitukora ku turikuba nitutendeka abashazi b’empaka abandi hamwe n’abatendeki. Emigisha eri omumupiira ogu eriyo neyeyongyera okwija  ahabw’okuba nitwenda kutandika kusherura entaranta turikutaho empaka zitari zimwe na zimwe kuatndikira aharurengo rw’ebyaro kandi ezi niziija kuba nizeetenga abatendeki hamwe n’abashazi b’empaka abatendekirwe,” Babirye nikwo agizire.

Ayongyeire yaagira ngu, “Hatwireho emigisha omumuzaano ogu kwonka abanya Uganda bakye munonga nibo bagikoreise. Omuzaani kuruga omuri Burengyerwa Izooba tarikwija kumanywa kugirangu nawe bamwete aha tiimu y’eihanga haaba hatariho za kiraabu ezirikuzaana omuzaano ogu. Mwine kukimanya ngu Netball tigwakiri muzaano gw’okutwaririza obwire beitu nagwo guriyo nigukora sente nk’endiijo,”

Okutendeka oku kukozirweho omushazi w’empaka rurangaanwa ow’aharurengo rwa 3 omu Africa, Milly Kamoga, kandi okutendekwa oku abantu 60 boona bakuhikire nikwo kutaaha na satifiketi, ekintu eki Babirye egi n’entandikiro nungi y’okutunguura omupiira gwa Netball omukyanga kandi ngu omubaro gwabo gushemereire kweyongyera ogundi murundi.

Orurengo oru abantu omukyanga kya Burengyerwa izooba barikuza omumuzaano obwa hati tiruri rw’ah’iguru aabw’okugira ngu kiraabu ya Holy Spirit Netball niyo eriyo nezaana omukyanga kyona bwanyima ya kiraabu za Nyamityobora, Kisenyi, Kakyenkye, Mandela, Bwera, Kasese, Kabarole, Kibare na Kibatsi kugwa zikahisyaho enkomo.

N’ebya Aloysius Byamukama

#WestSports