Oku Mbarara Munisiparite eyetekateekire kwakiira City ebiro 01.07.2020

Mbarara

Okumara obwire buringwa abeebembezi ba Mbarara Municipality barikushaba n’okwetebekanisa okuba city,ekirito n’eshaara  zaabo zirugireho zagarukwamu.Mbarara City  n’ey’okutandiika omu butongore.


Mbarara munisiparite niyo tauni mpango ya burengyerwa-izooba kandi etauni erikugaita eihanga rya Uganda na Rwanda omu by’okutambuza eby’obushubuzi.
Meeya Robert Kakyebezi ayorekire ngu Munisiparite yaheerize kuhiikiriza buri kimwe ekirikwetagisibwa okwakira City kandi beetekatekire ekirikumara okwakira City omubutongore.


Mbarara Munisiparite nemwe omu ma tauni 15 agahinguzibwe paramenti y’ihanga aha biro 28.04.2020 barikugyendera aha ngyendererwaho y’eihanga (Constitution) “Article 179(1) (A)” hamwe n’ebiragiro ebirikutegyeka za gavumenti z’ebyanga ebirikumanywa nka “Local Governments Act” akacweka (Section) ka 7 (2a) “CAP.243”.


Kakyebezi   ashoborire ngu ebiro 30.06.2020, nibakushaba Pooriisi okubikiriza okutambura okwetorora za Divijoni 6 zoona eza Mbarara Munisiparite barikworeeka okushemererwa n’okwesiima   barikwakira City omu butongore. Agizire ngu nibakuronda ebyoma, ahabw’endwara ya COVID-19 nibakutambura na abantu bakye batambuze amakuuru buri hamwe barikumanyisa abantu ngu Mbarara yakuura yaruga aha rurengo rwa Munisiparite, yaba City.


Oku betekatekire okwakira City
Okurugirira ahari tauni kiraka wa Mbarara Munisiparite, Theophilus Tibihika, omu mwaka gwa 1991 Mbarara Munisiparite ekaba aine abantu abarikwingana 41,031, omwaka gwa 2002 abantu 69,363. Omu rubaro rwa abantu oruhweire orwakozirwe 2014, nabantu 195,500 abarikutuura omuri Mbarara Munisiparite ngu kandi obwahati abantu 250,000 nibo abarikuteberezibwa kuba nibo abarikutuura omu Munisiparite.
Tauni kiraka ayorekire ngu okweyongyera kwa abantu aba orubaju orumwe n’omugisha kandi orundi nikibi ngu na ahabw’ekyo, tihariho omuntu n’omwe orikuza kugaruka kwikirizibwa okwombeka ataine purani erikuragira omu biragiro okwenda okwerinda omwijurano gw’etauni (slums).


Ayorekire ngu omuntu yakwatwa arikobeka atakurateire mateeka g’etauni, nakukorwaho nk’oku ebiragiro birikuragira. Ekya buri Muntu na bizinesi kwereberera Kasasiro (Garbage management)
Tibihika agizire ngu abantu bingi ku barikwija omu tauni,ni barya ,bakora,bagura ebintu  kandi ebi byo ebirikureeka kasasiro omu tauni. Ngu nka Kanso baheerize kusharamu kugira ngu buri muntu na buri bizinensi aine kwereberera kasasiro kandi n’okuronda abarikugibayorera bakagitwara ahi erikunagwa kutari kutegyereza kanso.  Kandi oraremwe okukora eki nainga yashangwa nanagwijura nainga arikwotsya kasasiro nakuvunanwa nk’oku amateeka garikuragira.


Eby’emishuburo kutebwa omu buteeka (Trade order)
Tauni kiraka agizire ngu eby’okushubura ni gumwe aha mirimo ey’amaani erikukorerwa omu tauni ya Mbarara.Ngu kwonka n’obu abantu barikwenda kushubura baitu baine kuba bari omubuteeka kutari kuteeka eby’emishuburo yaabo omu mwanya gw’abantu barikutamburiraho(Walking ways).
Agizire ngu tihakiriho muntu orikwikirizibwa okushuburira aha rubaju rw’enguuto naiga omu maisho g’eduuka yamutahi ngu ahabw’okuba na abingi abarikushuburira aha mihanda tibarikushashura na mushoro.


Eby’ebitara
Okurugirira ahari tauni kiraka Tibihika na Meeya Kakyebezi, city eshemerire kuba arikwaka etarimu mwirima. Okurwaniisa ekyo, hariho purojekiti y’okubyara ebitara eby’okukoresa amaani g’omushana (Solar street lights) eri omukugyenda omu maisho.Purojekiti egi etandikire  Biharwe, Koranorya, Mayanja, Banyu Road, Kampala-Katete, Pakamega, Isingiro road, Ruti, Mbarara referral Hospital, Rwebikoona, Kiyanja,Ruharo n’emyanya endaijo.
Omubaro gw’ebitara ebirikuza kubyarwa omu tauni okwetorora etauni ni byingana 704 kandi ni byakumaraho sente ezirikwingana biriyooni 6, miriyooni 575, emitwaro 85 na 100(6.57,585,100) kandi baheerize kushashuraho sente ezirikwingana biriyooni 1, miriyooni 972(1.972Billion).
Kakyebezi ayorekire ngu purojekiti ekabaire yaahweire baitu ekabanza kuteganisibwa endwara ya COVID-19 ngu kwonka ahi arabe yahweraire,Mbarara n’ekuba  n’eyaaka  nka za City  zoona ezindi.


Za Camera
Capt. Tumusiime Bamuturaki, Ceyapasoni wa Disiturikiti ya Mbarara agizire ngu Mbarara etweirwe n’eteganisibwa abaheenzi b’amateeka okukiira munonga abashuma.Ngu kandi baheerize kubyara za Kamera  ezirikurebwa n’ezitarikurebwa okwetorora  etauni yoona okubayambaho okurwanisa obuhenzi bw’amateeka omuri Mbarara.
Ayorekire ngu omurimo gw’okureberera za kamera ezi gukwatsibwe pooriisi kandi ebi za kamera zirikureeba zibitwariraho aha pooriisi. Kandi eki bakikozire okwenda kutereza eby’okwerinda bya buri muntu orikutuura omu tauni ya Mbarara n’emyanya egyehingurize.


Kakembo Yusufu, orikukurira  ekitongore eky’ebyokwerinda ekya  Local Defense Unit(LDU) agizire ngu  abantu bingi  batweire nibaazanazanira  omu  tauni ebaire ekiri nkye  ngu kwonka obu ekuzaire ekaba City  eby’okuzaana bihweireho. Bakwatanise n’ebitongore by’okwerinda ebindi ebirimu pooriisi na UPDF nibaza kuguma barikukora ebikwekweto okwetorora etauni yoona.
Ngu kandi wakwatwa orikuhenda amateeka n’okutwarirwaho omu kooti okavunwa.Ahi barabe batahikire   za Kamera nizakuguma nibayambaho.
Eby’okuyomberera abantu n’okushisha orwoya rw’okwitsya (Air and noise Pollution).
Tauni kiraka agizire ngu baheerize kumanyisa ab’ebyokwerinda  abarimu na pooriisi ey’ebyiruka(Trafiic Police) okukwata   buri motooka yoona erikushohoza omwiika mubi ogurikurofaza n'okushisha  omwoya gw’abantu bari kwitsya.


Ayongyeire yagiira ngu omuntu weena orikwenda kutandiikaho bizinesi ya y’ebyooma(Disco) ninga kutandiikaho Ekanisa(Church) aine kwombeka ebisiika ebitarikwikiriza ruyombo(Sound) kushohora kuyomberera   abandi bantu abari omu busingye bwabo.Ngu kandi oraremwe kukikora  naija kukwatwa.
Eby’okuhitsya aha bantu amaizi garikumara.
Amaizi mingi agarikwejunisibwa omu tauni ya Mbarara n’emyanya egyehengurize na ga National Water and Sewerage Company kandi agu barikwiha omu mugyera gwa Rwizi.
Meeya Kakyebezi agizire ngu okumara emyanya nyingi,Mbarara Munisiparite etwire arikubisibwaho omugyerwa gwa Rwizi  baitu  nagwo  ogutweire niguteeganisibwa ekyanda  aha bw’emirimo erikukorerwa omu rubanju rw’omugyera ogu.


Okurugirira ahari Emmanuel Ekanya, manegya w’ekitongore ky’amaizi ekya National water and Sewage cooperation (NWSC) omu kicweka kya Ankole,Mbarara Munisiparite n’emyanye egyehingurize n’eyetaga  amaizi agarikwingana “ 20 million Litres” burizooba  kandi omugyera gwa Rwizi ni gushohoza amaizi “13 Million litres” zonka.
Kandi okwenda kumariraho kimwe eibura rya amaizi omuri Mbarara City n’emyanya egyehingurize, Gavumenti ya Uganda eheerize kutunga sente ezirikwingana 7.9 biriyooni omu sente eza Uganda kuruga omu Government ya France okwiha amaizi omugyera gwa Kagera kuraba Isingiro mpaka Mbarara.
Omu by’amagara
Okurugirira ahari tauni kiraka Tibihika, Mbarara Municipality aine amarwariro 12 aga gavumenti (Government health centres) n’eirwariro eriri aha rurengo rwa ‘National Referral Hospital’ okwetorora za divijoni 6.Gamwe aha marwariro aga ni; Mbarara Municipal health iv,Kakoba health centre iii,Nyamitanga health centre iii,Ruti health centre ii,Nyamityobora health centre ii,Kamukuzi health centre ii,Nyakayojo health centre iii,Kicwamba health centre ii,Rwakishakizi health centre ii,Biharwe health centre iii,Rwemigina health centre 11 na Kyarwabuganda health ii.
Agizire ngu bariyo nibagyezaho okuhindura eirwariro rya Kyarwabuganda health centre ii okuza aha rurengo rwa “Health centre iii”. Oihireho ekyo,bariyo nibagyezaho okutenshagana  na  Dr. Nathan Karema mukama wa w’irwariro rya Mbarara Community Hospital okureeba ngu barigura.Nu kandi eki nikyaija kuyambaho eirwariro rya Mbarara Referral Hospital omu kutubya omwijurirano.


Eby’omushoro
Kajubi Benon, omuhandiiki mukuuru w’eby’esente agizire ngu Mbarara Munisiparite ebaire n’erundana omushoro kuruga omu mishuburo okwetorora za divijoni 6.
Tauni kiraka agizire ngu okutandiikana n’omwaka gw’eby’esente 2020/2021, nibaija kuhangaho ekitongore ekyetongwire ekirabe nikivunanizibwa aha by’emishoro n’entatsya ya City.
Agizire ngu baheerize kuhandiikira minisiture y’abakozi eya Public Service okubikiriza kandi ngu yaaherize kubikiriza.Ngu nibaza kugura n’ekyoma ekirabayambeho okurebuza nk’oku omushoro gurikushorozibwamu,kumanya oshashwire n’otakashashwire noha n’enshonga ahabw’enki ngu kandi eki nikaija kubayamba munonga omu kutungura eby’entatsya.


 Eby’enguuto
Meeya agizire ngu   baine oruguuto rwa Northern bypass orukwingana oburingwa bwa “14 kilometres (8.7 mi)” kandi ekigyenderwa ky’oruguuto oru kikaba kiri eky’okutubya omwijurirano gw’eby’entambura okukiira munonga ebimotoka ebihango aha gaati omu tauni. Oruguuto oru nirutandiikira aha fakitore ya Coca-Cola eri aha rwa Mbarara-Masaka Road ruraba  omuri Rwebishuri omuri Kakiika, Nkokonjeru omuri Kamukuzi  rukwata omu rwa Mbarara-Kabale Road ahari Katatumba Resort.


Kakyebezi ayorekire ngu 21 km ziheerize kukorwa ahansi ya purojekiti ya Urban Support for Municipal Infrastructure Development (USMID) ezirimu enguuto nka Bulemba, Bishop Wiils, Bucunku,Akakiiki Nyabongo,Mclister,Markhansing,Constantino lobo na  Mbaguta. Ezindi eziri omukukorwa nuizingana  na  20km ezaraganisibwa  Purezidenti Yoweri Kaguta Museveni  kandi na sente eziri omukukora enguuto ezi niziruga omu gavunti ya Uganda.


Oihireho ezo,Kakyebezi agizire ngu  baheerize kukora enguuto ezindi ezirimu;Katamba-Rwagaju-Rwemikunyu road(11.2KM)  aha sente ezirikwingana 135.47 Million,Rwagaju-Kikade road (4km) aha sente ezirikwingana 52million,Ruceece-Mitsyamo (3k) aha sente ezirikwingana 52million,Karugangama road (6km) aha sente ezirikwingana  13million,Rwarire-Ngara road (6km) aha sente ezirikwingana 11Million n’ezindi.