Okukora kubi omu PLE bakwegyekyereire ahabashomesa, Kiruhura

Bamwe omubazaire hamwe n’abandi abarikujunaanizibwa ahabw’obwegyese omuri Kiruhura beegyekereire okukora kubi kw’abeegi omubigyezo bya PLE omu disiturikiti ya Kiruhura ahabw’omwaka ogwa 2020 ahabasomesa abatarikumanya kukora omwoga gwabo.

Barikurabira omubebembezi baabo abebembeirwe Tayebwa Herbert, omujwekyerwa w’eishengyero ahabw’ishaza erya Kashongi aba bashabire abashomesa omuri Kiruhura na munonga omu ishaza erya Kashongi ku baijurirwa ahabw’eishaza ryabo kukora kubi imubigyezo bya PLE.

Okurugiirira ahabyarugire omubigyezo bya PLE omwaka oguhwaire amashomero agatari ga gavumenti gakozire kurungi kusinga aga gavumenti.

Robert Abigaba, omuzaire hoona we ayegyekyereire okukora kubi kw’amashomero aga ahabw’obutafayo kuguma nibakyebera amashomero aga oku garikukora omubikwatiraine n’eby’obwegyese ekireetsire abashomesa baabura kufayo omumirimo yaabo.  

Geoffrey Mugisha kandi hoona nawe omuzaire agizire ngu, “Ku turaabe nitwenda kwongyera ahamutindo gw’ebirikuruga omubigyezo bya PLE, abo boona abarikukwatwaho na munonga orikwebembera eby’obwegyese ahadisiturikiti ashemereire kwongyera ahakushwijuma amashomero hamwe n’okukoragana n’abebembezi b’amashomero kureeba eki baakorera ekizibu ky’okukora kubi omubeegi.  

Hoona we MP Tayebwa agizire ngu ekizibu nikireetwaho abashomesa abatarikukora kurungi nk’oku batendekirwe hamwe n’okubura kukunda omurimo gwabo.

Agizire ngu, “Abashomesa b’ebiro ebi baremirwe kukunda omwoga gwabo. Kandi tibarikwehayo kukuza omwana bakamukora eki barikwenda omubiro by’omumaisho.”

Hoona Charles Kiberu Nsubuga, CAO wa disiturikiti ya Kiruhura ayegyekyereire okukora kubi kw’amashomero ga gavumenti ahabazaire abatarikushagika baana baabo omumiteekateekyere hamwe n’esente ku kirikuhika ahanshonga y’eby’obwegyese.

Hoona nabwo ayongyeire yaagira ngu okwosha kw’abaana ah’ishomero na munonga ku garikuba gari amazooba g’obutare n’ebikomera.

Abazaire n’abarikujunaanizibwa ebi babigambire obu babeire nibakora ehururu y’emyoga omurukiiko orubaire rutebeekanisiibwe omuny’eishengyero Tayebwa Herbert omuri Kashongi, Kiruhura.

N’ebya Evans Atwine 
#WestUpdates