Omushaho oshomire naija kushaashurwa miriyooni 5 buri kwezi- Purezidenti

Purezidenti Yoweri Museveni ayikiriize ku abashaho n'abandi banya sayansi bongyerwa omushaara aho n'aho oteireho n'obusiimo bwabo nk'oku babeire baikiriziine na Gavumenti wiiki ehwaire.

 

Museveni agizire ngu abashaho boona abaine ebipapura by’obwegyese nibeija kuba nibatunga  omushaara gurikwingana miriyooni 5 za Uganda buri kwezi kutandika n’omwaka gw'eby'esente ogurikwija 2022/2023.

 

Purezidenti ayongyeire yeikiriza ngu abashaho ab’orurengo orw’ahaiguru batungye emotoka za gavumenti kandi abandi beikirizibwe kutunga emotoka ezitariho mushoro.

 

Orikukurira ekigombe ekirikugaita abashaho, Dr Sam Oledo asimire Purezidenti Museveni ahabw’okwikiriza akaija kubabugana kandi yagaruka yamusiima ahabw’omurimo ogu akozire omu kurwanisa oburwaire bwa COVID-19 hamwe n’obuzahambuki omu ihanga.

 

Ebi byona bibaireho eizooba rya nyomwabazyo obu Museveni abugaineho ab'ekigombe ekirikugaita abashaho omu ihanga ekya UMA omu makagye ag’obwa Purezidenti omuri Entebbe.

 

#WestUpdates