Orubaju oruhakani rweikiriza okugaruka omu paramenti

 

Orubaju oruhakani omu paramenti rwashazamu akeesharingo kaabo ak’obutaza mukushutama kwa Paramenti bwanyima y’orukiiko orubaagiraho akasheeshe aka.

 

Kurugiirira aha baaza omu rukiiko oru, abany'eishengyero baikiriza kushazamu akeesharingo kaabo bwanyima ya bimwe ahabyetengo byabo kuhikiirizibwa.

 

Orubaju oruhakani rwebembeirwe ekibiina ekya National Unity Platform (NUP) bakanga okuza omu ishengyero kwiha esabiiti ehwaire bwanyima y’abany'eishengyero, Allan Ssewanyana owa Makindye West hamwe na Muhammad Ssegirinya owa Kawempe North kugarukamu kukwatwa.

 

Ababiri aba bakakwatwa aha manja z’obwitsi, okwenda kwita hamwe n’okushagika obuzahambuki, ebiine akakwate n'obwitsi obubaire omukyanga ekya Masaka empango.

 

N’obu baraabe baikiriziibwe okwemerererwa, aba bakagaruka baakatwa ab’eby’okwerinda.

 

Egi niyo enshonga ereeteire orubaju oruhakani bebembeirwe Mathias Mpuuga okwesharingira okuza omu paramenti ahabw’okukwatwa kwa bataahi baabo.

 

Beitu eriizooba baagira ngu nibaija kugaruka omu kushutama kwa paramenti kutandika n’eriizooba Orwakabiri bwanyima ya gavumenti kuraganisa okureeba ngu haabaho oburingaaniza.