UBSA batungire eitaka ry'ekishaayi ky'omupiira ogw'omumushenyi, Buliisa

N’obu haraabe habeireho entuguuka omumuzaano gw’omupiira gw’ebigyere ourikuzaanirwa omumushenyi omu ihanga, hoona abantu babeire batarikwija omubwingi okuguroreera ahabw’okuburwa ebishaayi.

 

Kwonka eki kiri haihi kuhwaho wayebdera ahankoragana eziizire nizihwaho ahagati y’ekibiina ekirikukurira omupiira ogu ekya Uganda Beach Soccer Association hamwe n’abantu abarikukwatwaho kureetaho ebishaayi hamwe n’ebindi bintu bingi ebirikukoresibwa omumuzaano ogu.

Obwa biso, aba batungire eitaka rirkwingana hiika emwe omu disiturikiti ya Buliisa kwombeka ekishaayi ky’omupiira gw’omumushenyi.

Omwanya ogu gukaheebwayo eishomero rya Kisansya Primary School omu tauni ya Buliisa

Orikwebembera ekibiina ky’omuzaano ogu Deo Mutabaazi kandi hoona otayayeire omwanya ogu ogw’ahaishomero rya Kisansya agizire ngu eki nikiija kuhwera kutunguura omuzaano ogu omuri Buliisa hamwe n’amadisiturikiti agandi agagihereire.  

“Eki nikyoreka ngu habeireho entunguuka omumuzaano hamwe n’enkoragana nungi n’abo abarikukwatwaho kandi bakashagika omuzaano gw’omupiira gw’omumushenyi omu Uganda. Ninyebaza ekyanga ekya Kitara ahabw’okuranzya hare kugira ngu bazaane omupiira gw’omumushenyi aharurengo rw’ekyanga nk’oku kiri omu manifesito y’orikwebembera ekibiina ky’omupiira gw’ebigyere obwo arikutandika encuro nsya ahantebe,” Mutabazi nikwo agizire.

Meeya w’etauni ya Buliisa, Muliisa Epafurah agizire ngu beetebeekaniise kuheereza obushagiki bwona oburikwetaagisa kwenda ngu omuzaano ogu gutunguukye omukyanga eki.

“Nyine okusiima kwingi ahabw’okugira ngu omurimo ogu gwahika aha. Nitwija kuha obushagiki bwona kureeba ngu omurimo ogu gwakorwa. Hariho emigisha mingi erikureetwaho eby’emizaano hamwe n’omupiira okutwariza hamwe,” Muliisa nikwo agizire.

Abandi bakuru kuruga omukibiina eki kandi hoona abahikire ahamwanya ogu babeire barimu Ali Mwebe, Bashir Mutyaba, Tony Ssebagala na Mutebi Julius.

Ekishaayi eki ku kiraahwe, nikiija kuba kiri ekishaayi kya kabiri omu ihanga bwanyima y’ekishaayi ekya FUFA ekirikushangwa omuri Njeru.

Enyimaho, UBSA ekeegaita n’abandi bashagiki nk’aba ahari Lido Beachkugira empaka z’okuhayana nangwa n’aharurengo rw’eihanga.

Diana Kaboha omukuru kuruga omukyanga ekya Kitara kandi hoona omujwekyerwa omukazi ahabw’ekyanga ekya Kitara omuri FUFA, James Ayebale, George Kabwimukya, Harunah Alinde, Favour Gilbert  Businge kandi hoona nabo abahikire ahakushwijuma omwanya ogu, bakozire omurimo gw’amaani kureebeka ngu omurimo ogu gwatandika.

Okutunga eitaka eri nikukurata ebintu bintu ebibeire byaheirwe ekibiina ekya FUFA. Ebi birimu, eitaka erya Kadiba omuri Mengo kandi hoona eryabahairwe ekanisa, Lugazi omuri Buganda n’ery’eka y’aba Rujumba aharuguuto nyeigyendwa orwa Kampala - Hoima.

N’ebya Shafik Ssenoga
#WestSports