Uganda Premier League – Nyamityobora FC netayayisa Vipers ahari Kakyeka

Nyamityobora FC

Omuzaano ogu Vipers neija kuba netandikisa omuzaani waabo musya omuteebi Hamis Diego Kiiza oherize kubegaitaho arikuta omukono ahandagaano y’ameezi 6 kuruga omu tiimu ya Fasil Kenema FC eya Ethiopia.


Kiiza n’omuzaani wa kabiri kwegaita ahari Vipers bwanyima ya Innocent Wafula oguzirwe omuri Kenya.

Vipers sizooni egi niyo tiimu yonka omu mpaka za Uganda Premier League etakasingirwemu omu mizaano 16 kandi eine obubonero 34 enyima ya KCCA FC eyebembeire ekimeeza ahari 37.

Nyamityobora eyi barikuzana nayo eherize kusinga Police gooro 4 ahari 1 esabiiti ehweire, kandi ahari Kakyeka sizooni egi basingiirweho omuzaano gumwe gwonka ogw’empaka za Uganda Cup barikushohozibwa Proline.

Omuzaano ogwa raundi yokubanza ,Vipers ekagusinga emwe ahari busha ahari Kitende beitu sizooni etakatandikire ogw’okwegyezamu Nyamityobora ekagusinga 1-0 ahari Kakyeka.

Omu mizaano endiijo, KCCA FC nekwatana n’aba Onduparaka FC ahakishayi Lugogo. Maroons nekwatana n’aba Mbarara City FC Luzira. Ndejje eine URA FC deeru Paidha Black Angels netayayisa aba Bul FC.