Uganda yasingura emidaari 3 ya GOLD omu International Schools Sports Federation

Radio West

Tiimu ya Uganda ey’abairuki yahenderera omumwanya gwa kabiri omumpaka zoona ez’abairuki omumizaano y’amashomero ga siniya ag’abahansi y’emyaka 15 eya International Schools Sports Federation eriyo nehindira omururembo Belgrade omuri Serbia bwanyima y’okurundaana emidaari etaano ya GOLD, gumwe gwa SILVER na gumwe gwa BRONZE.

Uganda etandikire kurungi erikusingura emidaari 3 ya GOLD aharwokubanza kandi nyomwebazyo orwakabiri tiimu egi eyebembeirwe James Onzima eyongyeireho omudaari gwa GOLD ogundi hamwe n’ogwa BRONZE.
Levi Kituri yaaba aine kukora n’amaani kureebeka ngu yasinga Andril Shymchu owa Ukraine ou yasingisa obusekonda bukye munonga atyo akatwara GOLD omukwirukanga empaka za mita 800 ez’aboojo.
“Ninsiima Ruhanga ahabw’okumbeeraho ahabw’okuba byaba bitanguhi kandi n’ahabw’okugira ngu ogu n’omudaari gwangye gw’okubanza ogwa GOLD, ninyija kukora n’amaani kusingura emidaari endiijo omubiro by’omumaisho,” Levi Kituri nikwo yaagira.
Kwaba kuri okujaguza omunkambi ya Uganda obu Brenda Chekwemoi yairukanda akaraba ahari Milena Smolensika owa Ukraine hamwe na Michaela Ivankova owa Slovakia arikwiruka mita 100. Aba yaagaruka  yaabarabaho omumpaka za mita 800 kutwara GOLD endiijo ey’eizooba.  
Uganda kandi hoona yahendera eizooba n’omudaari gwa SILVER omukwiruka akati aka Medley Relay bwanyima y’okuhendera bari aba kabiri enyima ya Ukraine omubazaani ab’abaishiki. Nikwo kuhisya GOLD 5, SILVER 1 na BRONZE 1 enyima ya Namibia kandi hoona abaarundaana emidaari 2 ya GOLD na BRONZE 2 hakakurataho Ukraine n’emidaari 2 ya GOLD.
Tiimu y’abantu 25 eya Uganda nibaayana omumpaka za Swimming, Chess, Badminton, Table Tennis na Basketball 3*3 kandi hoona ahi twaza kutungira amakuru aga, aba Basketball baaba bari ab’okuzaana na Ukraine
Uganda team of 25 are competing in swimming, chess, badminton, table tennis and basketball 3*3. Omu Basketball, Uganda yateera Ukraine obugoba 9 ahari 8 kandi baahika ahari kamariirizo ahi barikuza kukwatana n’abarikutaayayisa empaka ezi aba Serbia ekirikumanyisa ngu ahamidaari 2 eya SILVER na GOLD hariho gumwe oguraarugyeyo.
Abarikuziha amaizi nibaija kuba nibahayana nyencakare nabo barikusherura omudaari kandi hoona bo ab’akapiira ka Tennis baahika aharurengo rw’omudaari ogwa BRONZE.
Emizaano egi erikuza kumara wiiki yoona obwo eyejumbeirwemu abazaani kuruga omumahanga 43 neija kwigurwaho nyencakare omubutongore kandi ehendere ebiro 19.09.2021

N'ebya Aloysius Byamukama