Vipers, Police, BUL na Express nibahayanira 50m

Omu Brazil kandi Kooki Roberto Oliveira n’omuhwezi we kuruga Portugal Marcelo Cardoso nibaija kutandika emirimo yaabo nk’abatendeki ba Vipers FC obwo kiraabu erinzire kuzaana omuzaano ogurikubatwara ahari kamariirizo z’empaka za Stanbic Uganda Cup ahakishaayi kya FUFA ekya Njeru.

Ababiri aba baheirwe endagaano y’emyaka 3 kandi bateirwemu amatsiko maingi kutwara tiimu egi omumaisho. Cardoso we yaatandikire n’okweteekateekyera omuzaano ogu barikuza kuzaana kiraabu ya Police kandi naakihamya ku abazaani be beteekateekyeire omuzaano ogu.   

“Ku ndikureeba okwetebeekanisa oku tugizireho omumizaano ey’enyima, abazaani boorekire ku barikweyikiririzamu munonga. N’ahabw’ekyo obu nibwo  bwire bw’okuzaana nabo ahabw’okuba nitwehurira kurungi kandi nitwenda kusoonga emizaano. Eki n’ekintu kirungi ahabw’okuba aboojo nibenda kuguma nibazaana kurungi kuhamya omutindo gwabo,” Cardoso nikwo arikugira  

Okutaanaho n’enyima ahi omupiira gwa semi final gwabeire guzaanwa emirundi ebiri, omuka n’ahabugyenyi, ogw’omurundi ogu nigwija kuba gumwe.

Ebihandiiko ebirikubaikiriza kukora eirimo ebya siizoni y’omwaka 2020/21 nibiija kwikirizibwa ahabazaani abarikuza kuzaana kandi abatendeki nabo nibaija kuba baine ebihandiiko byabo ebya “bench permits”

Kiraabu ya poorisi kandi hoona abaherize kuurugwaho abaazaani baabo n’aob’okugaruka kwerundaana busya kwenda bateho omutindo omukuzaana kwabo kandi kooki waabo Abdallah Mubiru naikiriza ku baine amaani agabarikubaasa kuremesa Vipers

“Ahakutandika kwa siizoni, nikiba kiri ekirooto kya buri omwe kugira eki baasinga ahamuheru kandi eki nikiba nikyebesa enaku y’obutasingura ekikopo kya liigi. Buri omwe ahatiimu ayetebeekaniise na munonga abazaani. Twetebeekaniise kutaho omuraaro murungi omumuzaano gwa Vipers. Nitubaha ekitiinisa kyabo kwonka titurikubatiina ahabw’omukuba tibari b’omutaano,” Mubiru nikwo arikugira.

Obu bahereeruka kuzaana kumwe omumpaka za liigi, Vipers ekarugayo esingire na goora 3 ahari 2

Omuzaano ogundi ogurikutwara za kiraabu ahamuzaano ogwa kamariirizo, BUL FC neija kukwatana na Express FC, abaherize kuruga omumpaka eza CAF Champions League.

Orasingure empaka z’omwaka ogu eza Uganda Cup naija kugyenda n’esente zirikuhika miriyooni 50. Ezi zeyongyeire bwanyima ya Kansai Plascon kwegaita omumpaka ezi. Abaraabe aba kabiri nibaija kutwara miriyooni 20 kandi aba kashatu nibaija kutwara miriyooni 12. Abahikire aharurengo orwa quarter final n’ab’okutwara miriyooni 6 buri omwe kandi abahendereire omururengo orwa za tiimu 16 hamwe na 32 nibaija kutwa miriyooni 3 na miriyooni 1 n’ekicweka nk’oku bakurataine.

N'ebya Shafiq Ssenoga

#WestSports